11 İyu 02:23GÜNDƏM / Köşə

BİC-BİCLƏRİN MƏMLƏKƏTİ

BİC-BİCLƏRİN MƏMLƏKƏTİ

Xaqani Ədəboğlu


Dünən xaricdə yaşayan bir həmyerlimiz məni o ki, var danladı. Başladı ki, biz burada insan kimi yaşamağı bacarmırıq. Dedi ki, hər cür sərvətiniz var, amma acından ölürsünüz. İşləmək üçün geridə qalmış Rusiya bazarlarında piştaxta növbəsinə durursunuz. Rüşvət vermək üçün yarışırsınız. Elə düşünürsünüz ki, icra başçısı istəyəndə sizi İbrahim peyğəmbər kimi boğazlayıb kəsə bilər. Nələr və nələr söylədikcə məni qan-tər basdı. Dözməyib kinayə ilə dedim ki, guya sizdəkilər mələk, şəhəriniz isə cənnətdir?
Müsahibim daha da aktivləşərək yaşadığı şəhərin özəlliklərini sadalamağa başladı. Cəmiyyətin və dövlətin ali məqsədinin İNSANA xidmət üçün yönəldildiyini gözümə soxa-soxa soruşurdu: "Sizdə bu var? Bu var? Bu var?"...
Boğazım qurumuşdu. Özümü daha çox imtahan sualına cavab tapmaqda aciz qalan bisavad tələbəyə bənzətdim. Özümü cəmləyib dostumdan soruşdum: "Sizdə Hacıbala müəllim var?"
Dostumu gülmək tutduğunu görüb hücuma keçdim: "İkicə nəfər məmur göndərsək, sənin o tərifli Almaniyanı bircə ilə başınıza çökdürərlər. Biz, bilirsənmi, neçə belələrini yola veririk?"
Amma doğrusu çox düşündüm. Doğrudanmı, biz hər kəsin gözünə cin-şəyatin kimi görsənirik? Biz niyə bu gündəyik?
Televiziyalarımıza baxıram, ağıl adına bir şey tapa bilməzsən. Qeyrət adına Samiri, namus adına Aygünü ekran yarlığına döndərmişik. Bizim yolumuz əvəzinə, at izi it izinə qarışan bir yolsuzluğumuz var. Səhiyyəmiz pulsuzdur, amma həkimlərimiz pasientdən pulu bəri başdan almağı qərara alıblar. Çünki müalicə bitən kimi pasient tabuta girib özünü eşitməzliyə vurur. Bizimkilər ölməyə də vaxtı düz seçə bilmirlər. Təhsilimiz bərbad haldadır. Müəllim şagirdin başını deyil, cibini imtahan edir. Mətbuatımız bir köşədə yazdığım kimi "öz cəlladını sevən məşuqə" kimi şenlənir. İqtisadiyyatımız ölmüş atasına kreditlə bahalı mərmər daşı qoydurmuş bir zavallının durumundadır. Artıq nə o ölüdən, nə də o qara daşdan bir fayda yoxdur.
Bu gün bu xalq öz boğazından kəsib bahalı maşınlarda gəzdirdikləri məmurlarından elə də çox şey istəmir. Sadəcə nəzakətlə deyir ki, adam olun və bizi adam kimi dinləyin. Dinləyin və lap bağlı olduğunuz "urus soldatı" kimi yalandan "est" deyib pis işlərinizi davam etdirin. Amma başımıza məmur etdiklərimiz aşkarcasına deyirlər ki, xalqın şikayətinə baxsaq presendent yaranar və onlar pis öyrənib zəhləmizi tökərlər. Barı bir lətifədə deyildiyi kimi, heç olmasa "təpik vuranların sayını artırın"...
Bəli, dostum! Düşünmə ki, sən bizdən ağıllısan. Dünyada bicliyin iki növü var. Bir var bic-bic, bir də var gic-bic.Gic biclər hər yerdə var. Amma biz bic-biclərlə göz-gözə yatırıq. Sən o uzaq Almaniyadan mənə öyrətdiyin dərsi burada kimsə oxumaz. Çünki biz öz günahımızı həmişə onda-bunda, lap adam tapmayanda isə ermənidə axtararıq. Amma biz həmişə günahsızıq. Çirkab, rüşvət olan yerdə Allah olmaz. Amma biz oruc tutub niyaz edər və namaz qılarıq. Bir soruşan yoxdur ki, ay mömün, ay şeytana qaya atan hacı, yediyin haram, gördüyün günah, eşitdiyin yalan, namazın heç, sənin o dəstəmazın nəyə yarar ki? Bu vəziyyət, daha çox bir bölgədə Allahın evində zina edən bir axunda xitabən, "tfu" deyən o biri sıravi mollaya: "Qoy bu əlimdəki savab işi qurtarım, sənə Allahın evinə tüpürməyi göstərəcəyəm"- dediyi bu sözlərə bənzəyir. Biz hələki edənin əlini deyil, deyənin dilini kəsib, görənin gözünü tökürük, çünki günümüzün sahibi bizlər deyilik. Biz neçə ki, güzgüyə baxıb qonşunun arvadına söyürük, biz neçə ki, pislik torbası olan qarın daşımaq missiyası ilə yaşayırıq, biz neçə ki, "can gəldi gedərdi, var-dövlətə sarılmışıq", biz neçə ki, ümummilli işimiz naminə beş dəqiqəlik zina üçün keçdiyimiz milyonlardan 5 qəpiyimizə qıymırıq halımızdan məmnun olmalıyıq. Sizlərə tövsiyyəm odur ki, o avropalılar yazıqdır. Qayıdıb gəlin, öz ölkəmizə, elə bir yerdə ölək! Çünki biz öz hərəkətlərimizlə yaşamaq uğrunda deyil, ölmək uğrunda çalışmaqdayıq!
Bir kişinin ki, yurdu əsarətdə, milləti köçkün və qaçqın, ziyalısı düşkün, məmuru miskin ola kim səni sevər ki?
Amma öz aramızdı, bizim nə günahımız var?
Bic-biclərin məmləkətində gic-biclərin yaşaması belə olur!
Şərh əlavə etmək
Adı:
E-Mail Ünvanı:
Kalın İtalik Altı Çizili Üzeri Çizili | Sola Yasla Ortala Sağa Yasla | İfade Ekle Bağlantı EkleKorumalı Link Girin Renk Seç | Gizli Metin Alıntı Ekle Farklı Bir Alfabe ile Yazılmış Olan Seçili Metni Kiril Alfabesine Çevir Spoiler Ekle
Kodu girin:

AZƏRBAYCAN VƏTƏN MÜHARİBƏSİ VETERANLARI İCTİMAİ BİRLİYİ