Səbail Rayon Məhkəməsinin hakimi Şəhla Süleymanova keçmiş Müdafiə naziri Rəhim Qazıyev barəsindəki həbs qəti-imkan tədbirinin ev dustaqlığı ilə əvəz edib.
Fedai.az “SAVAŞ”-a istinadən xəbər verir ki, bu barədə vəkil Elçin Sadıqov məlumat yayıb. O bildirib ki, ev dustaqlığı qəti imkan tədbirinin müddəti 13 noyabr 2020-ci il tarixədək müəyyən edilib.
Dövlət Təhlükəsizlik Xidməti (DTX) tərəfindən həbs edilən Rəhim Qazıyev Cinayət Məcəlləsinin 281-ci (Dövlət əleyhinə yönələn açıq çağırışlar) və 282-ci (Təxribat) maddələri təqsirli bilinir. Səbail Rayon Məhkəməsinin qərarı ilə onun barəsində 4 ay müddətinə həbs qəti imkan tədbiri seçilmişdi.
DTX-nın yaydığı məlumatda bildirilirdi ki, 2020-ci il iyulun 12 və 13-də sabiq Müdafiə naziri Rəhim Qazıyevin Azərbaycan-Ermənistan sərhədində düşmənin təxribatları ilə bağlı döyüş əməliyyatlarının aparıldığı və bu barədə Müdafiə Nazirliyi tərəfindən ictimaiyyətə müntəzəm rəsmi məlumatlar verildiyi bir vaxtda, məqsədyönlü şəkildə sosial şəbəkələr vasitəsilə hadisələrin mahiyyəti barədə aşkar surətdə həqiqətə uyğun olmayan xəbərlər yayıb. Azərbaycanın müdafiə qabiliyyətini zəiflətməyə yönələn hərəkətlər edərək insanları iğtişaşlara, dövlət hakimiyyətini zorla ələ keçirməyə açıq çağırışlar etməklə təxribat törətməsinə əsaslı şübhələr müəyyən olunub.