Azərbaycan Müdafiə Nazirliyinin ən son məlumatına görə, Ermənistanla sərhəddə hələ də atışma davam edir.
Çərşənbə gününə keçən gecə pozulan atəşkəs nəticəsində ölən və yaralananlar var.
Ermənistan 3 hərbçisinin öldüyünü, ikisinin yaralandığını bildirib. Azərbaycan da iki hərbçisinin yaralandığını açıqlayıb.
Azərbaycan və Ermənistan atəşkəsin pozulmasında bir-birini ittiham edir.
Azərbaycan Müdafiə Nazirliyi yaydığı son məlumatda bildirib ki, Ermənistan-Azərbaycan dövlət sərhədində Bakı vaxtı ilə saat 10:00-dan etibarən atəşkəsin elan olunması ilə bağlı Rusiya tərəfinin təşəbbüsünü qəbul etsələr də, «Ermənistan tərəfi əlavə olaraq tank və 120-millimetrlik minaatanlardan istifadə etməklə vəziyyəti gərginləşdirməkdə və mövqeləri atəşə tutmaqda davam edir».
Azərbaycan Müdafiə Nazirliyi açıqlayıb ki, iyulun 28-nə keçən gecə Ermənistan silahlı qüvvələrinin bölmələri Basarkeçər rayonu ərazisindən Azərbaycan ordusunun Kəlbəcər rayonu ərazisindəki mövqelərini atıcı silahlar və qumbaraatanlardan növbəti dəfə intensiv atəşə tutub.
Nəticədə Azərbaycanın iki hərbi qulluqçusu — Əliyev Sadiq Nizami oğlu və İmranlı İmran Dilqəm oğlu yaralanıb, nazirlik bildirib.
Mənbə: BBC