Azərbaycan Vətən Müharibəsi Veteranları İctimai Birliyinin (AVMVİB) sədri Füzuli Rzaquliyev, müharibə veteranı,hərbi həkim İmran Qurbanovu, həm koronovirusa qarşı aparılan mübarizəyə, həm də Vətən müharibəsində ön cəbhədə hərbi hospitalda göstərdiyi misilsiz xidmətlərə görə Fəxri Fərmanla və təşkilatın təsis etdiyi «AVMVİB 25 İL» Xatirə medalıyla təltif edib.
Təltif münasibətiylə müharibə veteranı İmran Qurbanovu təbrik edən Füzuli Rzaquliyev, onun Vətən çağırışına, hər iki müharibəyə könüllü qoşulmasını və səyyari hospitalların təşkil edilməsindəki xidmətlərini qeyd edərək dedi:
«Bu gün cəmiyyətimizdə həkim sənəti haqqında birmənalı şəkildə iki fikir formalaşmışdı: Bir qisim onlara hədsiz hörmətlə yanaşır, zəhmətlərini anlayır və dəyərləndirir, başqa bir qisim isə əksinə, hər fürsətdə onları tənqid edir, bütün bəlaların səbəbkarı imiş kimi yarğılayırdılar. Heç kimə sirr deyil ki, həkimlərimiz son illər ərzində iki cəbhədə mübarizə aparmalı oldular. Ölkəmizdə və dünyada üst-üstə baş verən hadisələr İmran Qurbanov kimi həkimlərin önəmini və həkimliyin nə qədər uca peşə olduğunu bir daha hər kəsə göstərdilər. Bircə faktı deyim ki, koronovirusla mübarizədən sonra Naftalana müalicəyə gedən İ. Qurbanov müharibə başlayan kimi müalicəni yarımçıq dayandıraraq yaralı əsgərlərimizin müalicəsi üçün könüllü və heç bir çağırış gözləmədən hərbi hospitalda fəaliyyətə başlayıb. Birinci Qarabağ müharibəsində qazandığı təcrübə bir çox yaralımızın həyatlarını xilas etməyə vəsilə olub. Ona görə də AVMVİB Rəhbərliyi hərbi həkim İmran Qurbanovu Fəxri Fərman və Xatirə medalıyla təltif etmək qərarına gəldi. Daha ali mükafatlara layiq olan veteranımızı veteranlar adından təbrik edir və fəaliyyətində uğurlar arzulayıram».
Mərasimdə AVMVİB sədrinin təşkilati işlər üzrə müavini Vahid Abdurəhmanov da iştirak edirdi.
İmran Qurbanov hər bir veteranın ocağı olan AVMVİB-ə və onun rəhbərliyinə göstərilən diqqət və qayğıya görə öz minnətdarlığını bildirdi.
Təbrik edirik!
Elnur Səlim
