Bu gün silahdaşlarımızdan birinin — Azərbaycan Vətən Müharibəsi Veteranları İctimai Birliyinin (AVMVİB) internet televiziyası olan Veteran TV-nin və veteran.az saytının regional müxbiri, Qarabağ müharibəsi veteranı Qədirov Elçin Vahid oğlunun doğum günüdür. Noyabr ayının 20-si onun yubiley yaşı — 45 yaşı tamam olur.
Qədirov Elçin Vahid oğlu 20 noyabr 1979-cu ildə Beyləqan rayonunda dünyaya gəlmişdir. İstedadlı jurnalist, hərbiçi və ictimai fəal olan Elçin Qədirov Vətən müharibəsi dövründə həm ön, həm də arxa cəbhədə Vətənə borcunu layiqincə ödəyən fədailərimizdən biridir.
Elçin Qədirovun fəaliyyəti yalnız hərbi xidmətlə məhdudlaşmamış, müharibənin ən gərgin və təhlükəli anlarında, cəbhənin ən qızğın nöqtələrindən hazırladığı reportajlar və çəkilişlərlə həm də peşəkar jurnalist kimi fərqlənmişdir. Onun çəkilişləri yalnız hadisələrin reallığını əks etdirməklə qalmır, həm də döyüş ruhunu, Azərbaycan əsgərinin şücaətini və vətənpərvərliyini nümayiş etdirirmiş, xalqın milli birliyini möhkəmləndirməkdə, şəhidlərimizin unudulmamasında, cəmiyyətdə onlara qarşı sevgi və məhəbbətin formalaşmasında müstəsna rol oynamışdır.
Elçin Qədirovun ictimai fəaliyyəti də diqqətəlayiqdir. O, vətənpərvərlik mövzusunda keçirilən tədbirlərin təşkilində, şəhidlərin Anım Günlərində fəal iştirak edib şəhidlərimizi təbliğ etməklə, gənc nəsli Vətənə və dövlətə sədaqət və milli dəyərlər əsasında tərbiyələndirilməsində əhəmiyyətli iz qoyur.
Azərbaycan Vətən Müharibəsi Veteranları İctimai Birliyi Qədirov Elçin Vahid oğlu doğum günü yubileyi münasibəti ilə təbrik edir, ona uzun ömür, cansağlığı və jurnalist fəaliyyətində uğurlar arzulayır.
AVMVİB Mətbuat xidməti
