NATO-nun baş katibi Yens Stoltenberq Rusiya ilə təsir dairələri üzrə dialoq ideyasını rədd edib. O, “Journal de Dimanche” qəzetinə müsahibəsində belə bir konfransın keçirilməsinin geriyə addım olduğunu bildirib.
«Böyük dövlətlərin qonşularının nə edə və nə edə bilməyəcəyinə nəzarət edə biləcəyi təsir sahələrini yenidən müzakirə etdiyimiz yeni konfrans ideyası bizi geri çəkilməyə məcbur edər və bu tamamilə yanlış istiqamətdir» deyə bildirib.
Digər tərəfdən, NATO Rusiya ilə etimad tədbirlərinin, silahlara nəzarətin, təlimlərin şəffaflığının, gərginliyin azaldılmasının və “münasibətləri yaxşılaşdıra biləcək hər şeyin” müzakirə edilməsinin tərəfdarıdır.
«Ancaq bunlar bizim fundamental prinsiplərimizi pozmaq hesabına olmalı deyil», — Stoltenberq vurğulayıb.
NATO-nun baş katibi deyib ki, Moskva “de-fakto Ukraynanın Rusiyanın təsir dairəsinə qayıtmasını tələb edir” və Ukrayna ərazisinə müdaxilə olarsa, “böyük bədəl” ödəməli olacaq.
Stoltenberq dekabrın 16-da bildirib ki, NATO hərbi alyansı Rusiyanın etirazlarına baxmayaraq, genişlənmə prosesini davam etdirir.
“NATO genişlənmə prosesini davam etdirir. Biz Rusiyanın etirazlarına baxmayaraq, artıq Monteneqro və Şimali Makedoniyanı sıralarımıza qəbul etmişik”, — Stoltenberq bildirib.
O qeyd edib ki, alyans 2008-ci ilin aprelində Buxarestdə NATO sammitində alyansın Ukrayna və Gürcüstanı «nəhayət qəbul edəcəyi» vədinə yenidən baxılmasını tələb edən Rusiyaya güzəştə getməyəcək.
Dekabrın 17-də Rusiya Xarici İşlər Nazirliyi ABŞ-la müqavilə layihəsini və NATO hərbi alyansı ilə zəmanətlər və təhlükəsizlik haqqında sazişi dərc edib. Xüsusilə, sənədlər onun ərazisindən kənarda orta və daha qısa mənzilli yerüstü raketlərin yerləşdirilməsindən imtinanı və NATO hərbi blokunun şərqə doğru genişləndirilməsindən imtinanı nəzərdə tutur.