Azərbaycan ilə Türkmənistan arasında iqtisadi və humanitar sahələrdə əməkdaşlıq üzrə birgə hökumətlərarası komissiyanın tərkibinə dəyişiklik edilib.
Bununla bağlı Prezident İlham Əliyev sərəncam imzalayıb.
Sərəncama əsasən, Azərbaycanın Baş nazirinin birinci müavini komissiyanın tərkibindən çıxarılıb və onun yerinə Azərbaycanın iqtisadiyyat naziri əlavə edilib.
Həmçinin iqtisadiyyat nazirinin müavini də komissiyanın tərkibindən çıxarılıb.
Qeyd edək ki, Xarici İşlər Nazirliyi komissiyanın Azərbaycan tərəfindən tərkibinə edilmiş dəyişiklik barədə Türkmənistan tərəfinə müvafiq bildiriş göndərəcək.
Azərbaycan ilə Qırğız Respublikası arasında iqtisadi və humanitar sahələrdə əməkdaşlıq üzrə birgə hökumətlərarası komissiyanın tərkibinə də dəyişiklik edilib.
Sərəncama əsasən, Azərbaycanın Baş nazirinin birinci müavini komissiyanın tərkibindən çıxarılıb.
Onun yerinə komissiyanın tərkibinə Baş nazirin müavini Əli Əhmədov daxil edilib.
Habelə, Azərbaycan Respublikası ilə Belarus Respublikası arasında iqtisadi əməkdaşlıq üzrə birgə hökumətlərarası komissiyanın Azərbaycan Respublikası tərəfindən tərkibində dəyişiklik edilib.
Dəyişikliklə Baş nazirin müavini Əli Əhmədov Komissiyanın tərkibinə daxil edilib. O, bu vəzifədə Baş nazirin birinci müavinini əvəz edəcək.
Ə.Əhmədov hər iki komissiyaya Azərbaycan tərəfdən sədrlik edəcək.
Qeyd edək ki, Xarici İşlər Nazirliyi komissiyanın Azərbaycan tərəfindən tərkibinə dəyişiklik edilməsi barədə Qırğız Respublikası və Belarus Respublikasına müvafiq bildiriş göndərəcək.
