AVMVİB Yasamal rayon şöbəsinin sədr müavini İlkin Ağayev və Yavər Məmmədov Xəzər rayonunun Binə qəsəbəsində yerləşən “Ümid Yeri” Uşaq Sığınacağını ziyarət ediblər.
Cəmiyyətin mənəvi inkişaf səviyyəsi onun həssas qruplara, xüsusilə də qayğıya ehtiyacı olan uşaqlara göstərdiyi münasibətlə ölçülür. Bu gün ölkəmizdə valideyn himayəsindən məhrum olmuş, çətin həyat şəraiti ilə üzləşən uşaqların reabilitasiyası və cəmiyyətə inteqrasiyası istiqamətində mühüm addımlar atılır. Belə fədakar missiyanı sevgi və məsuliyyətlə yerinə yetirən nüfuzlu qurumlardan biri də “Ümid Yeri” Uşaq Sığınacağıdır.
Müəssisəyə reallaşdırılan növbəti səmimi ziyarət zamanı sığınacağın fəaliyyət mexanizmi, uşaqların gündəlik həyat tərzi və gələcəyə hazırlıq prosesi yaxından müşahidə edildi. Sığınacağın rəhbəri Nigar xanım Mənsimovanın rəhbərliyi altında formalaşan peşəkar kollektiv burada məskunlaşan hər bir fərdin inkişafına xüsusi həssaslıqla yanaşır. Bizi qarşılayan müəssisənin məsul əməkdaşı Könül xanım uşaqların fiziki, pedaqoji və mənəvi tərbiyəsi istiqamətində görülən işlər barədə ətraflı məlumat verdi.
Sığınacaqda diqqət çəkən ən mühüm məqamlardan biri uşaqların gündəlik fəaliyyətinin düzgün rejim əsasında qurulmasıdır. Burada sakinlərə sadəcə sığınacaq verilmir, həm də onların tam və balanslı qidalanması, tibbi və psixoloji reabilitasiyası yüksək səviyyədə təşkil olunur. Yaradılan isti ailə mühiti uşaqların keçmişdə yaşadıqları sarsıntıları unutmasına və cəmiyyətə sağlam fərdlər kimi adaptasiya olunmasına zəmin yaradır.
Təhsil və pedaqoji fəaliyyət sığınacağın prioritet istiqamətlərindən biridir. Uşaqların müntəzəm təhsili dövlət məktəblərində təmin olunmaqla yanaşı, müəssisədə çalışan pedaqoqlar və tərbiyəçilər tərəfindən dərs hazırlığı prosesi də nəzarətdə saxlanılır. Fərdi və qrup şəklində keçirilən məşğələlər uşaqların intellektual səviyyəsinin və dünyagörüşünün artırılmasına xidmət edir.
Uşaqların estetik zövqünün formalaşdırılması, yaradıcılıq potensialının üzə çıxarılması məqsədilə müəssisədə müxtəlif dərnəklər fəaliyyət göstərir. Rəsm, xalçaçılıq və əl işləri emalatxanalarında uşaqların nümayiş etdirdikləri bacarıqlar onların zəngin daxili dünyasından xəbər verir. Bununla yanaşı, sağlam nəslin yetişdirilməsi məqsədilə fiziki tərbiyə və idman fəaliyyətlərinə də xüsusi önəm verilir.
“Ümid Yeri” Uşaq Sığınacağına edilən bu cür ziyarətlər və göstərilən ictimai diqqət orada yaşayan azyaşlıların mənəvi dünyasına böyük stimul verir. İnsanpərvərlik prinsiplərinə əsaslanan bu fəaliyyət gələcəyimiz olan uşaqların cəmiyyətdə layiqli yer tutması üçün mühüm körpü rolunu oynayır.
Ziyarətin sonunda balacalarla birlikdə xatirə şəkilləri çəkdirilmiş, onlarla səmimi söhbətlər aparılmışdır.
AVMVİB-in Mətbuat xidməti
.jpg)
.jpg)
.jpg)