«30 il öncə Dağlıq Qarabağın və Azərbaycan torpaqlarının 20 faizinin işğalı ilə yaşanan qətliamlar azərbaycanlı qardaşlarımızla bərabər bizim də ürəyimizi dağlamışdı”.
APA-nın məlumatına görə, bunu bu gün hakim Ədalət və İnkişaf Partiyasının (AKP) 7-ci qurultayında Türkiyə Prezidenti, partiyanın sədri Rəcəb Tayyib Ərdoğan bildirib.
Minsk Qrupunun ötən dövr ərzində fəaliyyətinin səmərəsiz olduğunu qeyd edən Türkiyə Prezidenti Ermənistanın dövrü olaraq atəşkəsi pozduğunu xatırladıb: «Azərbaycan bu müddət ərzində münaqişənin sülh yolu ilə həlinə çalışıb. Ermənistan keçən il sentyabrın 27-də növbəti dəfə təxribata yol verərək hücum etdikdə isə Azərbaycan hərəkətə keçdi və biz qardaş ölkənin yanında yer aldıq. Azərbaycan Ordusunun qəhrəmanlığı sayəsində 30 il davam edən işğala son qoyuldu”.
Ərdoğan Türkiyənin Azərbaycanla birgə keçən il noyabrın 10-da imzalanmış bəyanatın şərtlərinin yerinə yetirilməsinin təmin edilməsi üçün səylərini əsirgəməyəcəyini də vurğulayıb: «Türkiyə-Azərbaycan qardaşlığını daha da gücləndirən bu prosesin əldə olunan anlaşmaya uyğun şəkildə nəticələnməsini təqib edəcəyik”.
Xatırladaq ki, Zəngəzur Cəmiyyətləri İctimai Birliyinin sədri, tarix üzrə fəlsəfə doktoru Hacı Nərimanoğlu 9 il öncə Ərdoğanla görüşü barədə verdiyi açıqlamasında demişdi:
— Qarabağ həm də Türkiyənin sorunu. Mən əlimi bu daşın altına qoydum, bu sorunun həlli uğrunda çabalar göstərdim, buna davam da edəcəyəm. Amma sizinkilərin bir qismi yardım etməkdənsə, daşın üstdən basıb barmağımı qırmaq istəyirlər, araya fitnə-fəsad toxumu səpirlər. Hələ mənə həcvnamələr də yazırlar, Ərdoğanı İsrailə, ABD-yə, masonlara işləməkdə suçlayırlar, olurmu belə yanaşma?! Bayraq krizini adlatdıq, nota vermək zorunda qaldıq…