Bu gün silahdaşlarımızdan birinin — Azərbaycan Vətən Müharibəsi Veteranları İctimai Birliyinin (AVMVİB) Şuşa şəhər şöbəsinin sədri Hafiz Bulud oğlu Qəmbərovun doğum günüdür. Hafiz müəllim 13 noyabr 1956-cı ildə Şuşa şəhərində anadan olmuşdur. O, Azərbaycan Respublikasının Milli Qəhrəmanı Ramiz Qəmbərovun qardaşıdır.
Hafiz Qəmbərov, AVMVİB Şuşa şəhər şöbəsinin sədri vəzifəsində çalışdığı müddətdə hərbi-vətənpərvərlik mövzusunda müxtəlif tədbirlər təşkil etmiş və bu tədbirlərdə fəal iştirak etmişdir. O, Birinci Qarabağ müharibəsində olduğu kimi, 44 günlük Vətən müharibəsi zamanı da ön və arxa cəbhədə böyük fədakarlıqlar nümayiş etdirmiş, gənc nəslin vətənpərvər ruhda yetişməsinə töhfə vermişdir. Onun həm müharibə, həm də sülh dövründə göstərdiyi əzm və qətiyyət, Azərbaycanın ərazi bütövlüyü uğrunda apardığı mübarizəyə və dövlətin hərbi sahədə əldə etdiyi nailiyyətlərin təbliğinə mühüm dəstək olmuşdur.
Azərbaycan Vətən Müharibəsi Veteranları İctimai Birliyinin rəhbərliyi Hafiz Bulud oğlu Qəmbərovu doğum günü münasibəti ilə təbrik edir, ona sağlam həyat və uzun ömür arzu edir.
AVMVİB Mətbuat xidməti
