Azərbaycan Vətən Müharibəsi Veteranları İctimai Birliyinin (AVMVİB) Nəsimi rayon şöbəsində Azərbaycan Silahlı Qüvvələri Günü münasibətilə bayram tədbiri təşkil olunmuşdur. Tədbirdə AVMVİB sədri Füzuli Rzaquliyev tərəfindən müharibə veteranlarına təbriklər çatdırılmış, onların Vətən uğrunda göstərdikləri qəhrəmanlıq və fədakarlıq yüksək qiymətləndirilmişdir. Nəsimi rayon şöbəsinin sədri, polkovnik Elmar Hüseynov, Binəqədi rayon şöbəsinin sədri Mərdən Ələsgərov, həmçinin AVMVİB üzvü və ictimai fəallar Rüxsarə Cumayeva və Zakir İbrahimov tədbirdə çıxış edərək Silahlı Qüvvələrimizin 107 illik tarixini və müharibə veteranlarının bu prosesdəki əvəzsiz xidmətlərini vurğulamışlar. Çıxışlarda, həmçinin 2020-ci ildə 44 günlük Vətən müharibəsində qazandığımız zəfər, ordu quruculuğunda əldə olunan nailiyyətlər və Azərbaycan Silahlı Qüvvələrinin xalqımızın təhlükəsizliyindəki rolu təhlil edilmişdir.
Tədbirdə, müharibə veteranlarının hərəkatın formalaşmasında və Silahlı Qüvvələrin inkişafındakı fəal xidmətlərinə görə bir qrup veteran Fəxri Diplomla təltif olunmuşdur. Bu mükafatlar, onların Azərbaycanın müstəqilliyi və ərazi bütövlüyü uğrunda apardıqları mübarizəyə verilən dəyərin göstəricisi olmuşdur. Tədbir yüksək əhval-ruhiyyə və vətənpərvərlik hissi ilə sona çatmışdır. Bayram tədbirinin təşkil edilməsi, Silahlı Qüvvələrimizin şanlı tarixini anlamaq, müharibə veteranlarına olan ehtiramı bir daha nümayiş etdirmək baxımından mühüm əhəmiyyət kəsb edir.
AVMVİB-in Mətbuat xidməti
