«CivilNet» erməni onlayn telekanalının reportyorları Azərbaycanın Şuşa rayonunun rus sülhməramlılarının müvəqqəti məsuliyyətində olan ərazilərində yerləşən Salatınkənd kəndindən reportaj hazırlayıblar.
EDNews-in tərcümə etdiyi videoda kənd sakinləri rus sülhməramlı kontingenti, mövcud vəziyyətlə bağlı narahatlıqları və evlərini tərk etmək planlarından bəhs ediblər.
Onların fikrincə, rus sülhməramlılarının kəndin yaxınlığında postda durması lazım idi, amma faktiki olaraq orada yoxdurlar.
— Baxın, postlarda rus sülhməramlıları yoxdur. Postlar boşdur. Belə davam edərsə, təbii ki, buradan gedəcəyik, — yerli sakinlərdən biri jurnalistlərə bildirib.
Həmkəndlisi onu dəstəkləyib.
Ümidimiz yalnız Allahadır. Ümid edirik ki, hər şey yaxşı olacaq. Lakin erməni qoşunları oranı tərk edib. Buna görə də səssiz qala bilmərik», o deyib.
Digər bir kənd sakini İrəvandan gələn jurnalistlərə bildirib ki, rus sülhməramlıları öhdəliklərini yerinə yetirmirlər.
— Onlar kəndin yaxınlığındakı postda olmalıdırlar, amma deyillər. Bayraqlarını beş dəqiqəlik gətirdilər və dərhal postu tərk etdilər.
Telekanalın digər həmsöhbətinin sözlərinə görə, kənddə cəmi 140 nəfər yaşayır, lakin hamısı çamadan əhval-ruhiyyəsindədir. Onun sözlərinə görə, insanlar arasında çaxnaşma hökm sürür. Bir dəfə hətta kəndlilərin getməli olduğu ilə bağlı məlumatlar yayıldı, amma sonra planlar dəyişdi.
«Biz bu cür yaşayırıq — sülhməramlılar varmış kimi, amma əslində onlar yoxdur», o deyib.
Gördüyümüz kimi, Rusiya sülhməramlılarının müvəqqəti məsuliyyəti altında olan ərazilərdə həyat heç də asan deyil. Amma bu, Azərbaycanın günahı deyil. Bildiyiniz kimi, ölkəmizdə ən yüksək səviyyədə Qarabağda qalan ermənilərə sülh və layiqli həyat hüquqları təmin edildi. Azərbaycan vətəndaşının pasportunu aldıqdan sonra orada sülh və layiqli şəraitində yaşamağa davam edə biləcəklər. Azərbaycan Prezidenti İlham Əliyev iqtisadi şəraitin yaxşılaşacağını və yaşayış vəziyyətinin yaxşı olacağını dəfələrlə açıq şəkildə bəyan edib.
Ümumiyyətlə, Salatınkənd kəndinin sakinlərinin əhəmiyyətli dəyişiklikləri görmək üçün başları üzərindən boylanıb Şuşaya baxmaları kifayət edir. Şəhər gözlərimizin önündə dəyişir, orada yeni yollar, enerji və məişət obyektləri tikilir, möcüzəvi şəkildə sağ qalan yaşayış evləri və tarixi obyektlər bərpa olunur. Və müqayisə edin. Heç bir mübaliğəsiz, buradakı həyat barıt çəlləyini xatırladır. Qarabağda qalan 20-25 min erməninin keçmişə aid səhifələri vərəqləyib gələcəkdə yaşamağa başlamağın vaxtıdır. Və buna əgər onlar gələcəklərini Qarabağla bağlasalar, yalnız Azərbaycanın tərkib hissəsi olduqları halda zəmanət verilə bilər. Axı, Salatınkənd sakinlərinin çox qəzəbləndiyi sülhməramlılar müvəqqəti yerləşdikləri yerlərdə əbədi qalmayacaq və gec-tez oranı tərk edəcək. Və sonra Qarabağ erməniləri seçim qarşısında qalacaq: Azərbaycan ərazisini tərk edib Ermənistana və ya xaricə getməyə başlamaq (əlbəttə ki, heç kimə lazım olmadıqları yerlərdə) və ya qalaraq Azərbaycan vətəndaşlığını qəbul etmək və ölkəmizin tam hüquqlu vətəndaşı olmaq. Azərbaycan artıq öz təklifini açıqlayıb. Amma Qarabağdakı ermənilərin bunu eşidib-eşitməyəcəyini zaman göstərəcək.