İran Xarici İşlər Nazirliyinin mətbuat katibi Səid Xətibzadə Azərbaycan Prezidenti İlham Əliyevin «Anadolu” agentliyinə müsahibəsinə reaksiya verib.
Səid Xətibzadə «Mehr” agentliyinə müsahibəsində İran-Azərbaycan sərhədində keçirilən hərbi təlimlərlə bağlı danışıb. O bildirib ki, Azərbaycan Prezidentinin İran-Azərbaycan sərhədində keçirilən hərbi təlimlərə verdiyi qiymət «məyusedici»dir: «İran hər zaman hər hansı bir ərazinin işğalına qarşı olub və ölkələrin suverenliyinə, sərhədlərinə və ərazi bütövlüyünə hörmət edib. Bu, təhlükəsizlik məsələsidir və təlimlər bütün regionun sabitliyi üçün keçirilir”,- deyə o bildirib.
Xətibzadə çıxışı zamanı İsraillə bağlı da sərt ifadələr işlədib: «İran, əlbəttə ki, öz sərhədləri yaxınlığında sionist rejimin mövcudluğuna dözməyəcək və öz təhlükəsizliyi üçün lazım olan hər şeyi edəcək».
2021-ci il sentyabrın 27-də Azərbaycan prezidenti İlham Əliyev «Anadolu» agentliyinə müsahibəsində İranın Azərbaycan sərhədlərinin yaxınlığında hərbi təlimlər keçirməsi barədə bu sözləri demişdi: «Hər bir ölkə öz ərazisində hərbi təlimlər keçirməyə haqlıdır, amma nəyə görə məhz indi və nə üçün bizim sərhədimizdə?”.
Mənbə: Yeniavaz