“Arye Qut ağır xəstəlikdən sonra İsraildə xəstəxanada vəfat edib. Bu, bizim üçün böyük itkidir. Çünki onun miqyasında İsraildə Azərbaycan üçün vuruşan insan yoxdur”.
Bu sözləri Oxu.Az-a açıqlamasında İsraildə Azərbaycan Evinin rəhbəri Nexamiya Şirin Mixaeli deyib.
“Onun vəfatı diaspor üçün böyük zərbədir. İsrail vaxtı ilə saat 14:00-da vida mərasimi olacaq, mən də orada olacağam. Arye Qut Netanya şəhərində dəfn olunacaq”, — deyə o əlavə edib.
12:01
İsrailli jurnalist, beynəlxalq münasibətlər sahəsində siyasi ekspert Arye Qut vəfat edib.
Bu barədə Oxu.Az-a Diasporla İş üzrə Dövlət Komitəsinin mətbuat katibi Vəsilə Vahidqızı məlumat verib.
Onun sözlərinə görə, o, uzun müddət sürən xəstəlikdən sonra vəfat edib.
İsrailin Azərbaycandakı səfirliyinin mətbuat katibi Lalə İsgəndərova Oxu.Az-a bildirib ki, A.Qut xərçəng xəstəliyindən əziyyət çəkirmiş.
Qeyd edək ki, Arye Qut 1975-ci ildə Bakıda anadan olub. 2000-ci ildən İsraildə yaşayıb.
A.Qut həm İsrail, həm Azərbaycan mətbuatı ilə fəal şəkildə əməkdaşlıq edirdi.
O, Türkiyə-İsrail münasibətləri, İsrail və Azərbaycan strateji tərəfdaşlığı, Cənubi Qafqazda geosiyasi vəziyyət, eyni zamanda Ermənistan-Azərbaycan münaqişəsi ilə bağlı 700-dən artıq analitik məqalənin müəllifidir.
Arye Qut həmçinin Bakı Beynəlxalq Multikulturalizm Mərkəzinin İsraildəki nümayəndəliyinin və İsraildə Azərbaycan Evinin icraçı direktoru idi.